Einar Sæterbø, som i mange år har vore regionsjef for NVE i region Midt-Norge, er ein av bidragsytarane til «Du Mitt Nordmøre» i år.

Han har skrive artikkelen «Hendingar og mysterium mellom fjella i Sunndal», ei undringsreise i geologi og kraftutbygging.

Viktig utbygging

– Det var naturlevis ikkje planlagt. Men tilfeldigvis gjekk raset i Oppdølsstranda i haust, ei svært dramatisk hending som gjekk inn på mange. Sett i lys av dette, vart artikkelen til Sæterbø særleg aktuell og interessant, sier Reidun Dølehuset.

I artikkelen får lesarane ta del i historikken til kraftutbygginga, lære om landskapsformer, og skred i fjell og lausmassar i dette området.

Sæterbø seier han tykkjer det er artig å skrive, og understrekar kva Aurautbygginga har betydd for Nordmøre, ikkje berre på grunn av arbeidsplassane, men også fordi utbygginga har gjeve store ringverknader til regionen elles.

Variasjon

«Du Mitt Nordmøre» har kome ut sidan 1966, og Dølehuset har vore redaktør for heftet sidan 2000.

– Bladet er ein hobby for meg. Eg legg ned mange timar på innsamlig og oppsett av bladet. Men kjem og i kontakt med mange interessante og spennande menneske.

Redaksjonsmedlemmane Liv Krumsvik og Terje Ramsøy-Halle gav redaktøren blomster for arbeidet ho har gjort, under helgas samling i Surnadal.

Årets utgåve av «Du Mitt Nordmøre» har det internasjonale potetåret og kulturelt mangfald som to hovudtema.