SIGRID E. V. BØE

– Det er berre ein ting å seie: artig, utbryt Eli Norunn Furnes Fjærli frå scena når ho ser alle dei oppmøtte.

Songgruppa på fem vart danna i 1993 og fekk det særegne namnet Førkjånn. Dei framfører først og fremst coverlåter frå andre tekst- og melodiforfattarar, men har sitt eige særpreg.

Alle dei fem er frå Halsa, og dei fortel at dei ville gjera dette til eit reint halsaprodukt. Innspelingane er gjort live i Halsahallen, og foto, lay-out og mangfaldiggjering er alt administrert frå heimkommunen.

Ikkje berre har dei skrive brev til tekstforfattarar for å få lov til å flytte på ord i tekstane, dei har arrangert melodiane sjølve for å få det spesielle Førkjånn-særpreget som alle som skaffar seg CDen kjem til å merke.

Og så har dei teke i bruk lokale krefter. Margrete Seter har skrive fire tekstar til kvintetten, og Kolbjørn Botten har sett melodi til dei to nyaste som også er med på plata.